Бағдарлама Қазақстан Республикасының қылмыстық заңнамасындағы нормалардың мәтіндері мен заң терминологиясының бірізділігі мен анықтығын арттыруға бағытталған. Бұл мақсатта қылмыстық заңнамаға жан-жақты ғылыми талдау жүргізу, қолданыстағы заңнаманың тілдік мониторингін жүзеге асыру, қазақ және орыс тілдеріндегі мәтіндер арасындағы алшақтықтарды анықтау және оларды түзету, сондай-ақ қылмыстық құқық пен заңнама саласында қазақ тілінде бірыңғай заң терминологиясын әзірлеу көзделген. Бағдарлама заң мәтіндерінің шынайылығын қамтамасыз ету саласындағы түркі елдерінің (Түркия Республикасының) озық тәжірибелерін интеграциялай отырып, Қазақстанның қылмыстық құқығы саласындағы заң терминологиясының түсіндірме сөздігін құру арқылы заң мәтіндерінің дәлдігі мен сенімділігін қамтамасыз етуге бағытталған. Бұл отандық құқықтық базаны нығайтуға, Қазақстан азаматтарының барлығына заңдардың толық қолжетімділігін және түсініктілігін қамтамасыз етуге, сондай-ақ елдің ұлттық стратегиялық құжаттарында көрсетілген әлеуметтік-экономикалық даму мақсаттарын іске асыруға ықпал етеді.